Picardie Celtique

El Picardie étoait auterfos habitée pèr des gins celtes, chés Gauloés. El tière-lo avoait été lonmée pèr César, dins sin live El djère ed chés Gaules, « Belgique Esgonde », à coeuse que ch'nord del Frince à ch'timps ed chés Gauloés i s'lonmoait Belgique pour chés Romains.

Ch'ber à chés gins-lo est connu à coeuse ed César qui rapporte chés diries de ch'peupe voésin, Chés Rèmes (Reims).

 « Il o apprins (César) èque quasimint tertous chés Belges is étoètent nés natifs ed Germanie ; pi qu'apreu avoèr d'antan trécopé ch'Rhin, is sont restés in Belgique, à coeuse del foéson ed chés camps épi is avoètent caché chés Gauloés qui z'y restoètent edvint euzeutes ; pi coèr tout seuls, du timps ed chés tayons, quind chés Teutons pi chés Cimbes étoètent à démazinguer toute el Gaule, is les avoètent impéchés d'rintrer dins leu poéyis. El souvenanche-lo les rindoait grindius d'à part euzeutes pi inforchés ed djères. »

César, Djères ed chés Gaules, II, 3

Chés gins de ch'départemint, à chés temps celtiques, étoètent chés Ambiens. Ch'nom-lo vient du foait qu'is vivoètent alintour del Sonme, el signifianche est « cheux qui vivtent alintour ».

Leus voésins, chés Atrébates, étoètent un eute peupe celte ed Gaule Belgique pi qu'eune partie o débagagé dins l'île ed Bertagne (Granne Bertagne). Leu nom vient probabe du celtique *Adtrebates ed *Ad-treba-ti.Pétète « cheux qui ressent » obin « cheux qui z'ont des villaches » (cf.viu irlindais ad-treba « i resse, i tchultive », berton tre- « villache »), terduit in latin insuite in Atrebates.

Eune nature seuvage pi des bos oute et oute ?Des tchots honmes à guernons vivants dans chés bos pi cachant el singlier? Nan !

El Picardie, du timps ed chés Gauloés, n'étoét pon sitant ramuchée ed bos qu'innhui, pi aladon, chés Gauloés étoètent des grinds cinsiers. Dins no poéyis, o povoait treuver eune cinse à mi-tchilomète.Chés fôrets étoètent coeupées mais intertnues pour foaire du bos, pour étampir des moésons, pour raforer chés fus d'marichau pi pour tchuire chés poteries. El planne ale est rimplie ed camps adou qu'o tchultive du milet, ed l'avène, des fèves, des bleds, des pos, des lintilles, du lin, ed l'orge pi du canve. Chés patures raforent chés vaques, chés berbis, chés madjettes pi chés gvos.

Gramint d'lius gauloés pi gallo-romains ont été démuchés in Picardie.Ej m'in vos, dins cht'artique-lo, dviser ed quèque-uns pour amoutrer l'importanche qu'o pu avoèr el Picardie pindant chés Gauloés.

Cminchons alorsse avuc el plache ed Ribemont dsur Inque à 20 tchilomètes d'Amiens doù qu'o treuve l'un ed chés pus miroules pi pus grinds sites arcologiques de ch'Nord del Frince. Ch'est eune chité gallo-romaine qu'ale ercouve ale-meume chés singles resses in Urope Celtique d'un fameux liu ed tchulte gauloés avuc un timpe, un téyate pi des thermes.El plache-lo o été démuché à coeup d'vol d'aéro in 1963 pèr no célèbe Roger Agache et ale n'sro dégrattée foque 3 ans apreu. Ch'est pèr des tracheries inter 1968 et 1987 qu'os ons démuché des armes gauloèses, des oches ed gins pi avéré un viu lieu ed tchulte.

Dvisons achteure de ch'site ed Chambly d'où qu'y n'o un camp d'soèle gauloés. Ch'est ch' projet ed bâtir un moète-marqué qu'il o rindu ch'seurvice régional d'arcologie ed Picardie à dminder un egzamin arcologique de ch'liu. El trache foaite in févryi 1999 pèr l'AFAN o amoutré el perzince d'eune chimetière del période ed la Tène Anchienne (450 à 350 av JC). Sont aladon démuchés troés groupes ed luzets avuc chatchun des honmes, des fèmes pi des nazus ed tous âges.

Ches arcologues is ont estudié chés couteumes d'interremint gauloés. Adon ch'camp d'soèle-lo foait vir un passache à un nouvieu rite. L'interremint ed chés cadaves avuc des pinderlots pi des bistoquages est el couteume d'interremint el pusse aditée dins ch'poéyis.

Chambly i n'déroge point.Chpindant os ons ermartché qu'ale faisoait un eute rituel : ch'brulemint ed chés cadaves èque chés flacons is sont récoués dsur ch'fu pour ête insuite interrés dins des gatelous in chéramique obin d'eutes porrissabes. Ch'liu-lo est adon eune font rère pour comprinde chés couteumes d'interremint à ch'timps ed chés gauloés.

Ch'fameux sinctoère ed Gournay dsur Aronde à ch'Nord Ouest ed Compiègne est un liu à part li, d'abord pour sin acrinquillage déteupé mais itou à coeuse qu'il o été ravisé intièremint I s' treuve dins l'vallée ed l'Aronde pi dsur un cmin qu'il étoét el granne route trécopant ch'poéyis. A couté d'li, y n'o eune inchinte fortée ed 3 hectares otchupée à l'Tène Anchienne pi abindonnée à ch' IIIe sièque av JC.

Innhui in Picardie, l'est possible ed visiter quèquefos des sites arcologiques, mais itou ed vir chés réderies démuchées, dins chés musées picards conme chti d'Anmiens, d'Arro ou coèr Douai.

In o itou des rétampages ed villaches, conme à Samara., pi coère des achuchons d'Arcologie « adlive » conme chés Ambiani, achuchon d'arcologues pi ed matchés à vir si chés idées dsur chés réderies ales sont avérées.

I resse seurmint gramint ed coses à tracher pi biéseur à foère vir à chés Picards dsur leu histoère Gauloèse.

Coèr achteure chés Gauloés is sont lo à leu fachon.

On zzé rtreuve dins chés noms ed chés villes, pèr egzimpe ch'peupe ed chés « Ambiens » l'o baillé sin nom à l'ville d'Anmiens (Samarobriva à ch'timps Gallo-romain), pi aladon dins no parlage.

Quèques mots frincès qui vientent ed chés celtes :

ambassade, alouette, truie, javelot, bouleau, bec, bille, flanelle, barque, charpente, lande, charrue, bac, ardoise....

 Is sont quasimint d'un chint.

Meume ch'nom à no rivière (la Somme) ale vient ed « Samara ». Chés gins ed la Somme is s'lonment achteure chés Samariens.

 

Auteur : Benjamin Defert

Traduction en picard : David Lefèvre www.grebenote.com

Tous droits réservés © 2014